Sömuleiðis væri það glapræði að ætla að loka gatinu í ríkisfjármálum nú með því að hækka skatta á fyrirtæki. Það er raunar fullkomið ábyrgðarleysi, þegar stjórnarþingmenn tala um slíka skattahækkun sem óhjákvæmilega aðgerð eins og Álfheiður Ingadóttir, formaður viðskiptanefndar Alþingis, gerði í vikunni. Skattahækkun á fyrirtæki er vísasta leiðin til að kæfa endurreisn efnahagslífsins í fæðingu.
Það er ástæða til að stjórn taki mark á þessum röddum atvinnulífsins. Viðskiptaráð á við ákveðinn ímyndarvanda að stríða þessa dagana, vegna þess hve margir þátttakendur í útrás fjármálafyrirtækjanna eru þar enn í forsvari. En það eru ekki bara fallnir útrásarvíkingar sem hafa uppi málflutninginn um þörfina á skynsamlegri skattastefnu og aðgerðum í stað umræðna í Evrópumálum. Þetta eru skoðanir fólks, sem er í forystu fyrir traustum fyrirtækjum sem munu leggja grunninn að endurbyggingu íslenzka hagkerfisins eftir bankahrunið, tók ekki þátt í vitleysu í góðærinu – og veit um hvað það er að tala.
Um langt árabil hafa forsætisráðherrar mætt á Viðskiptaþing og sagt fundarmönnum að umræður í viðskiptalífinu um Evrópusambandið og evru væru ótímabærar. Nú varð breyting þar á. Jóhanna Sigurðardóttir orðaði það svo að innganga í ESB og upptaka evru væri forsenda langvarandi stöðugleika íslenzka hagkerfisins. Það vandræðalega við þennan hluta ræðu Jóhönnu var hins vegar að hún situr í forsæti ríkisstjórnar sem gerir nákvæmlega ekki neitt í málinu.
Svör fulltrúa núverandi stjórnarflokka í pallborðsumræðum um skattamál voru heldur ekki mjög uppörvandi. Á stjórnarheimilinu virðist ríkja mjög takmarkaður skilningur á því hvað það er auðvelt að drepa gullgæsina, sem verpir í ríkissjóð, með því að kreista hana of fast.
Leiðari MBL. 14.3.2009
Hver er þín skoðun?