Atkvæðagreiðsla Alþingis á dögunum um aðildarviðræður við Evrópusambandið er ein þeirra spennuþrungnu stunda þegar þjóðin sameinast fyrir framan sjónvarpið og ýmist þegir, sýpur hveljur eða skiptist á skoðunum um það sem fram fer. Enda var þingið að taka mikla og afdrifaríka ákvörðun sem mun hafa veruleg áhrif á líf og kjör þjóðarinnar.
Spennan stafaði þó ekki síður af því að niðurstaða atkvæðagreiðslunnar var ekki fyrirfram gefin, þrátt fyrir samkomulag ríkisstjórnarflokkanna um að umsókn um aðild að Evrópusambandinu væri ofarlega á verkefnaskránni.
Ljóst var að þorri þeirra þingmanna sem höfðu skoðanir andstætt útgefinni flokkslínu myndi ekki greiða atkvæði í samræmi við sannfæringu sína heldur í samræmi við flokkslínuna. Formenn Sjálfstæðisflokks og Framsóknarflokks höfðu í aðdraganda atkvæðagreiðslunnar farið mikinn um skoðanakúgun sem átt hefði sér stað hjá Vinstri grænum. Í ljós kom að flokksaginn reyndist ekki síður skilvirkur í herbúðum stjórnarandstöðunnar. Þingmenn hennar hefðu þó átt að hafa frjálsari hendur þar sem flokkar þeirra höfðu ekki undirgengist samkomulag eins og Vinstrihreyfingin grænt framboð gerði vissulega þegar hún gekk til ríkisstjórnarsamstarfsins. Eftirtektarvert er þó að enn er enginn þingmaður Vinstri grænna kominn út úr skápnum sem stuðningsmaður aðildar þótt átta þingmenn hafi greitt atkvæði með aðildarviðræðum.
Skoðanakönnun Fréttablaðsins sem tekin var á þriðjudagskvöld sýnir að meirihluti þjóðarinnar styður aðildarumsóknina sem í kjölfar atkvæðagreiðslunnar var skilað inn í vikunni sem leið. Samkvæmt könnuninni styðja tæp 59 prósent landsmanna aðildarviðræður við Evrópusambandið.
Mesta athygli vekur að nærri 57 prósent þeirra sem segjast myndu kjósa Vinstrihreyfinguna grænt framboð, ef gengið yrði til kosninga nú, eru hlynntir aðildarviðræðunum og er hlutfall stuðningsmanna aðildarviðræðna næsthæst meðal stuðningsmanna VG.
Stuðningurinn var, eins og við mátti búast, mestur meðal þeirra sem segjast myndu kjósa Samfylkinguna, eða tæplega 90 prósent. Meirihluti stuðningsmanna beggja flokka sem ríkisstjórnina skipa styðja því aðildarviðræður.
Einnig vekur athygli að fylgi við aðildarviðræður er ekki nema rúm 39 prósent meðal stuðningsmanna Framsóknarflokksins í könnuninni en sá flokkur hefur, utan Samfylkingar, gengið lengst í að álykta með Evrópusambandsaðild. Hlutfall stuðningsmanna Sjálfstæðisflokksins sem hlynntir eru aðild er hærra eða liðlega 46 prósent. Þessi hópur á einn fullrúa í þingliði Sjálfstæðisflokksins, Ragnheiði Ríkarðsdóttur.
Umsókn um aðild að Evrópusambandinu er eitt af stóru málum ríkisstjórnarinnar. Af könnun Fréttablaðsins má sjá að um það málefni ríkir samhljómur milli þjóðar og ríkisstjórnar. Þeim stuðningi getur ríkisstjórnin fagnað þrátt fyrir að fylgi hennar, samkvæmt sömu skoðanakönnun, nemi 43 prósentum.
Leiðari FRBL, 30.7.09
Hver er þín skoðun?